O pasado domingo 14 de xaneiro, celebrouse nas instalacións do Polideportivo do Cristo en Mugardos (A Coruña), unha nova Edición do Campionato Galego de Remoergómetro.

Cunha participación de 135 remeiros e 10 Clubs, celebrouse o Campionato Galego de Remo Indoor para as categorías de Alevín, Infantil, Cadete, Xuvenil e Senior, tanto Feminino coma Masculino, que unha vez máis fixo gozar ao respectable alí presente cunhas regatas moi disputadas e emocionantes.

Pola mañá, tocoulle abrir rolda de competicións á categoría Alevín Feminino, e tamén lles tocou a estas enormes remeiras darnos o que ía ser a pauta do resto da xornada, cunha demostración clara do que significan palabras como “loita”, “entrega” e “pudonor” nunha competición que nos puxo aos presentes o corazón nun puño ata a última palada, pois as 3 remeiras do Club Remo Ares, que ao cabo coparían por completo o podium de medallas, fixeron as delicias dos afeccionados entrando en meta cunha diferenza de tan só 4 segundos entre o Ouro e o Bronce.

Os seguintes en “saltar ao Ring” foron os Alevín Masculino, e eles non ían ser menos que as súas compañeiras, polo que nos brindaron unha regata para gardar na memoria, pois en tan só 4,5 segundos entraron os 5 primeiros clasificados.

A continuación tocoulle a quenda á categoría Infantil Feminino xa sobre unha distancia de 1000 m , e a diferenza de tan só 2 décimas de segundo entre as 2 primeiras ou que a terceira entrase a 8 décimas da primeira creo que o di todo, unha regata de infarto.

Na categoría de Infantil Masculino as diferenzas entre os participantes foron algo maiores, pero non por iso a proba foi menos emocionante, pois foi digno de ver a forza coa que remaron os participantes, ninguén dos alí presentes acabábase de crer que uns infantís fosen capaces de aguantar os 1000 m con aquela tremenda intensidade, e todo o mundo estaba pendente de ver quen sería o primeiro en “pinchar” polo tremendo ritmo e empuxe que estaban levando, cousa que non ocorreu, logrando unha regata que nos deleitou a todos.

Tampouco os Cadetes Masculinos ían ser menos vendo o espectáculo que nos deparaban os máis pequenos, e a loita polo segundo posto foi encarnizada cunha espectacular remontada do remeiro do Club Mar de Mugardos que fixo empregarse moi a fondo ao remeiro do Club Remo do Miño quen a duras penas logrou manter a vantaxe que conseguira no comezo da proba, conseguindo entrar con só 3 décimas de segundo de vantaxe sobre o remeiro local e a 6 segundos do gañador da proba, o remeiro do Club Remo Robaleira de A Guarda.

Outra bonita regata foi a que nos brindaron as mozas Xuvenís e as Senior, malia que houbo unha escasa participación en ambas categorías o que motivou que remasen xuntas, pero que tamén deu a oportunidade ás máis novas de medirse coas maiores e mostrarlles que é o que vén por detrás e que non deben durmirse, como onte quedou patente durante toda a proba na que as xuvenís trataron de ti a ti ás senior.

Na categoría Senior Masculino púidose ver remo de alto nivel onde ninguén se deu por vencido en ningún momento e logrando a chegada máis apertada que se pode lograr, pois houbo empate no 4º posto con 2 participantes que fixeron exactamente o mesmo tempo.

Xa pola tarde, comezaron as espectaculares competicións de relevos por equipos. Esta modalidade consta equipos formados por 4 remeiros que reman no mesmo ergómetro, polo que teñen que alternarse durante a proba. O momento do relevo é o máis espectacular e o momento crave onde se pode chegar a decidir a competición.